LU CARNEVALE


LU CARNEVALE
Nu face a tiempu cu passa NATALE
giri la capu e b'e' CARNEVALE.
Na 'ndore te pittule me inchie lu nasu
ancora..... intru casa ogni fiata ca trasu.
Subbra allu stipu,nisciunu nne ole,
ha rimasta na stozza te panettone,
do quantierine mancu tuccate
te purteddruzzi e de carteddrate,
na pasta te mendula a furma te triglia
e de spumante na menza buttiglia;
e nu zampone,ca ne l'imu scerratu,
me tole lu core cu bascia menatu,
e ci nu scade e ancora mantene,
ne lu cugghimu pe l'annu ci ene.
Ma mo' è CARNEVALE,continua la
festa,
passatu NATALE,...parlamu te quista.
Nu sacciu ci chiangu o tocca me presciu
cu bisciu la gente estuta te masciu:
masculi,.... fimmene ca fannu le pacce,
nu bitenu l'ura cu cangianu facce.
Ci sape te du ene tutta sta' pressa
cu lassi la toa pe n'aura diversa.
Certu 'nc'e' gente ca sape ce dia
cu troa n'aura facce e cu cangia la soa ;
specie ci è brutta, ecchia, mmucata
ca pe tutta la vita nu l'ha mai lavata.
Se uarda allu specchiu: ..."mo sai ce fazzu?
Mo me la cangiu sta facci te cazzu..!"
E magari ca tici,magari ca faci,
'nc'ete lu munnu chinu te masci !
Te parenu sani....e suntu malati.
Li iti puliti...e suntu mmucati.
Li faci onesti e all'ampruvvisa
te futtenu causi,mutande e camisa.
Si prontu te mini a mienzu allu fuecu?
E quiddru te futte te nanzi e de retu.
...Ma nu 'nce' besegnu te lu Carnevale
unu,quannu ole, se po' mascherare.
Li peccatori diventano Santi;
ci face lu riccu e nu tene nienti;
fimmene estute ca 'nci lassi l'ecchi
le iti spujate...e 'nc'ete cu scappi .
Quannu è momentu te votazioni
nu 'nc'ete nu fiaccu...'nc'e' sulu li bueni.
E li politici alla televisione...?
li masculi...moneci,le fimmene...suore.
Su tutti "chiesa","casa"e "famiglia"
sempre perfetti,nisciunu ca sbaglia.
Tantu ca Cristu quasi quasi ha decisu
cu se li porta a muzzu am'PARAISU.
Sangu li pija li sienti parlare
cu la ucca perta.... te fannu bbabbare .
Ma dopu nu picca ca l'ha uardati.....
nu suntu veri.....su mascherati!
All'apparenza te parenu Santi
arretu alla maschera suntu briganti.
E nui ce facimu...ne li uardamu?
O ne lliamu la maschera e li sputtanamu...?
Fintantu la gente se este te masciu
lu munnu nu cangia e bae sempre pesciu.
Cu li coriandoli, stelle filanti,
trombe e trombette nu cangia mai nienti.
Zzeccamuli tutti,unu pe unu,
pijamuli a cauci e nu sulu a 'nculu;
E damunne forte,facimunni male
cu se recordanu te lu CARNEVALE!
Allora sì,andaveru besogna
cu cangianu facce.....MA PER LA VERGOGNA!

Commenti

Post popolari in questo blog

Antonella, non posso tenerti per mano, allora ti porto nel cuore

Dove siete giovani?