NA FESTA TE... SINISTRA (?)

 NA FESTA TE... SINISTRA (?)

_"Ièni alla chiazza, 'nc'ete na riunione,
na bella festa,... gente te "sinistra".
'Sta fiàta la engìmu l'elezione,
giràmu lu paise capisutta."._

Aggiu pijàta a volu l'occasione,
bá tròu quarche amicu,...nu "cumpagnu".
Á rriàta para para 'sta riunione,
ne sta sentìa 'ndavèru lu besegnu.

Me sta purtàva puru le bandiere
ca tegnu muccecàte intru l'armadiu.
_" Làssa stare", m'ha dittu la mujère,
"l'áura fiàta te l'hanu rutte a 'ncapu"._

Aggiu 'nfurcàti... 'nchiàli e bicicletta,
cinque menuti dopu stìa alla chiazza.
Nu 'nc'era confusione, alla mmèrsa,
'nc'era la gente...tanta quantu basta.

Ma mentre ca girava soddisfattu
me inne a 'ncapu nu pensieru tristu.
Mo' bu lu cuntu, è quistu quai lu fattu,
...nun crísciu ancora a quiddrhu c'aggiu istu:

'Nc'i n'era te avvocati e professori,
tanti te "snob" tendenti
all'elitario,
signore sciccosissime, dottori,
tutta la borghesia del circondario.

E quiddrha ca parlava, l'oratrice,
la candidata, pare, a "deputatu",
parìa la "Matonna ausiliatrice"
c'assolve e libera te lu peccatu.

E tutti la uardàvanu estasiáti,
cu l'ucca perta comu scemisceddrhi,
'nci n'era tanti puru 'ngenucchiàti
e cinca se teràva li capiddrhi.

Tanta fedeltà e venerazione
nun l'hae mancu lu "Santu Patrunu"
quannu esse te la Chiesa a prucissione
e li devoti cèrcanu perdunu.

Pensai: ..."Nun pare gente te "sinistra".
Nu 'nc'ete nu furese, n'operaru,
nu cameriere ne' nu
camionista,
nu manovale,...mancu nu scarparu.

Ma dici, cazzu cazzu,
ca 'sta festa
nun bete quiddrha giusta e aggiu sbagliatu?
Mannaggia la vecchiaia disonesta ,
chianu chianu...me ne sta bau te capu".

N'amicu me uardava a 'nfacce,...fissu,
e ha capitu ca stìa frasturnàtu.
S'á cucchiàtu e ha dittu cittu cittu:
_"E' PROPRIU LA SINISTRA ...NU HA SBAGLIATU"._